Beekeeping | छत्रपती संभाजीनगर (Chhatrapati Sambhajinagar) मधील शेतकऱ्यांसाठी (Farmers) आनंदाची बातमी समोर आली आहे.  शेती व्यवसायासोबत मधमाशी पालन (Beekeeping) हा जोडधंदा केल्यास केवळ मध विक्रीतूनच नव्हे तर, पिकांचे उत्पादन वाढवूनही दुप्पट नफा मिळवता येणार आहे. मधमाशा फुलोऱ्यातील परागीभवन (Pollination) उत्तम प्रकारे करत असल्याने, पिकांच्या उत्पादनात लक्षणीय वाढ होते.

हा दुहेरी फायदा लक्षात घेऊन, राष्ट्रीय मधमाशी मंडळ (National Bee Board) आणि महाराष्ट्र राज्य फलोत्पादन व औषधी वनस्पती मंडळ (Maharashtra State Horticulture and Medicinal Plants Board) यांच्या संयुक्त विद्यमाने, मधमाशी पालकांसाठी राष्ट्रीय मधमाशी पालन आणि मध अभियान (National Beekeeping and Honey Mission) राबविण्यात येत आहे.

मधमाशी पालनाचे दुहेरी फायदे

मधमाशी पालनातून मधविक्रीद्वारे (Honey Selling) थेट उत्पन्न मिळते. याशिवाय, मधमाशांमुळे फुलोऱ्यातील परागीभवन चांगल्या प्रकारे होऊन, पिकांचे उत्पादनही वाढते. कोणत्याही पिकाचे उत्पादन हे त्याच्या परागसिंचनावर अवलंबून असते. चांगले परागसिंचन झालेल्या पिकाचे उत्पादनही अधिक होते.

मधमाशा या सर्वाधिक परागसिंचन करतात. त्यामुळे, मधमाशांचा पिकांना थेट लाभ होतो. “मधमाशी पालन हा व्यवसाय अत्यंत चांगला आहे. केवळ पाणी आणि फुलोरा अवस्थेतील फळबाग किंवा अन्य कोणतीही शेती यासाठी आवश्यक आहे,” असे जिल्हा कृषी अधीक्षक प्रकाश देशमुख (Prakash Deshmukh) यांनी सांगितले.

योजनेचा लाभ घेण्यासाठी काय कराल?

या अभियानाचा लाभ घेण्यासाठी, शेतकऱ्यांनी जिल्हा कृषी अधीक्षक कार्यालयात अर्ज करणे आवश्यक आहे. अर्जाची छाननी केल्यानंतर पुढील कार्यवाही करण्यात येते.

या योजनेसाठी अर्ज करण्यास, मधमाशी पालन व्यवसायाचे प्रशिक्षण घेतल्याचे प्रमाणपत्र, स्वतःची अथवा भाडेतत्त्वावरील शेती, अर्जदार शेतकऱ्याचा सातबारा, आधार कार्ड (Aadhaar Card), बँक खात्याची माहिती इत्यादी कागदपत्रे आवश्यक आहेत.

शासनाकडून प्रोत्साहन; आत्तापर्यंत ‘या’ संस्थांचे अर्ज दाखल

मधमाशी पालन व्यवसायातून शेतकरी चांगली कमाई करू शकतात. मध उत्पादनासोबतच या मधमाशी पेट्या भाड्यानेही देता येतात. त्यामुळे शासनाने या व्यवसायाला प्रोत्साहन देण्यासाठी केंद्रीय कृषी मंत्रालयांतर्गत राष्ट्रीय मधमाशी मंडळाच्या सहकार्याने अभियान हाती घेतले आहे.

“या योजनेसाठी आतापर्यंत तीन संस्थांचे अर्ज प्राप्त झाले आहेत. जास्तीत जास्त शेतकऱ्यांनी या योजनेचा लाभ घ्यावा,” असे आवाहन प्रकाश देशमुख यांनी केले आहे.

Title : Beekeeping Profitable Farming Honey Mission