छगन भुजबळांचा शरद पवारांवर अत्यंत गंभीर आरोप; महाराष्ट्रातील राजकारणात खळबळ

July 14, 2024

Chhagan Bhujbal serious allegations on Sharad Pawar

Chhagan Bhujbal | राज्यात सध्या मराठा आणि ओबीसी आरक्षणाचा मुद्दा प्रचंड चर्चेत आला आहे. मनोज जरांगे पाटील यांनी कालच (13 जुलै) छत्रपत्रि संभाजीनगर येथे भव्य शांतता रॅलीमध्ये सरकारला पुन्हा एकदा इशारा दिला आहे. त्यांनी सरकारला 20 जुलै पर्यंतची मुदत दिली आहे. मराठा आरक्षणाचा मुद्दा पेटला असताना अजित पवार गटाचे नेते छगन भुजबळ यांनी सर्वात मोठा गौप्यस्फोट केला आहे. त्यांनी शरद पावर यांच्यावर अत्यंत गंभीर आरोप केले आहेत.

आरक्षणाच्या आडून महाराष्ट्र पेटवण्याचं काम काही लोक करत आहेत, असा गंभीर आरोप राज्याचे नेते छगन भुजबळ (Chhagan Bhujbal) यांनी शरद पवार यांच्यावर केला आहे. त्यांच्या या आरोपांनी राज्यभरात एकच खळबळ उडाली आहे.

नेमकं काय म्हणाले छगन भुजबळ?

अजित पवार, रुपाली चाकणकर, सुनील तटकरे यांच्या उपस्थितीत राष्ट्रवादी काँग्रेसचा बारामतीत मेळावा आयोजित करण्यात आला होता. याच कार्यक्रमात भुजबळ यांनी हे विधान केलंय. राज्य सरकारने काही दिवसांपूर्वी मराठा आरक्षणावर मार्ग काढण्यासाठी सर्वपक्षीय बैठक बोलावली होती. या बैठकीला महाविकास आघाडीच्या तीनही घटक पक्षांकडून बहिष्कार टाकण्यात आला होता.

या बैठकीबाबतच आता भुजबळ यांनी मोठा खुलासा केलाय. “तुमचं वैर या छगन भुजबळशी असेल किंवा अजित पवारांशी असेल ओबीसी समाजाने तुमचं काय घोडं मारलंय?हे सगळं मिटवण्यासाठी तुम्ही आमच्याबरोबर का येत नाही? विरोधी पक्षाचे नेते बैठकीला येणार होते त्यांना बारामतीतून फोन गेला म्हणून ते आले नाहीत.”,असा खुलासा छगन भुजबळ (Chhagan Bhujbal) यांनी केलाय.

“महाराष्ट्र पेटवण्याचे उद्योग..”

पुढे ते म्हणाले की, “विरोधी पक्षातल्या नेत्यांना काहीतरी सल्ले द्यायचे. त्यानंतर पाठीमागून महाराष्ट्र पेटवण्याचे उद्योग करायचे.सामाजिक प्रश्न सोडवत असताना मुद्दाम बहिष्कार टाकायचा, मुद्दाम तिथे यायचं नाही हे योग्य नाही. निवडणूक असेल तेव्हा तुमचे झेंडे हाती घ्या, तुमचे मुद्दे मांडा.पण, सामजिक प्रश्नी सगळ्यांनी एकत्र यायला हवं.”, असंही भुजबळ (Chhagan Bhujbal) म्हणाले आहेत.

“ओबीसी समाजाला असं वाऱ्यावर सोडून चालणार नाही, हे अजिबात बरोबर नाही. बारामतीसह संपूर्ण राज्यातील सर्व समाजाचे लोक आहेत. सगळे आमचे आहेत आणि तुमचेही आहेत. एकत्र येऊन हा प्रश्न सोडवण्यासाठी आपल्याला सुबुद्धी देवो”,असं भुजबळ म्हणाले.
मराठा आरक्षण संबंधी भुजबळ यांनी शरद पवार यांच्यावर जोरदार हल्ला केलाय. त्यांच्या या आरोपांना आता शरद पवार काय प्रत्युत्तर देतात, ते पाहावं लागेल.