Chhatrapati Sambhaji Nagar Crime | छत्रपती संभाजीनगरमध्ये रविवारी रात्री एका 36 वर्षीय महिलेसोबत अत्यंत भयंकर प्रकार घडला.भावकीतीलच 36 वर्षांच्या महिलेकडे शरीरसुखाची मागणी करणाऱ्या 19 वर्षांच्या तरुणाने अंगावर काटा आणणारे कृत्य केले आहे. महिलेने नकार देताच या नराधमाने या विवाहितेवर कटरने भयंकर वार केले. (Chhatrapati Sambhaji Nagar Crime)
या हल्ल्यात ती महिला गंभीर जखमी झाली असून तिच्यावर 280 टाके घालावे लागले आहेत. तिच्या मानेपासून ते मांडीपर्यंतच्या खोल जखमेमुळे ती मृत्यूशी झुंज देत आहे. या प्रकरणी पोलिसांनी आरोपी अभिषेक तात्याराव नवपुते (Abhishek Tatya Navpute) याला अटक केली आहे.
19 वर्षीय नराधमाची क्रूरता
पीडित महिला शेतात काम करत असताना आरोपी अभिषेक नवपुते याने तिला फोन करून तिच्यासोबत जबरदस्तीची मागणी केली, तसेच तिच्या जावेच्या बाबतीतही अर्वाच्य बोलला. पीडितेने त्याचा फोन कट केला. संध्याकाळी ती शेतातून परत येत असताना आरोपीने पाठीमागून येऊन तिची वेणी ओढली आणि तिला जमिनीवर फेकले.
त्यानंतर तिला काही कळायच्या आत त्याने चेहऱ्यावर धारदार कटरने वार केले. महिलेने ओरडण्याचा प्रयत्न केला असता त्याने गळ्यावर वार केला आणि संपूर्ण शरीरावर सपासप वार केले. विशेषतः मानेपासून मांडीपर्यंत सव्वादोन फूट लांब वार केल्यामुळे तिच्या शरीराची अक्षरशः चिरफाड झाली.
“डॉक्टरांना माझं अंग अक्षरशः गोधडीसारखे शिवावं लागलं”
या हल्ल्यात महिला गंभीर जखमी झाली असून डॉक्टरांनी तिच्या शरीरावर तब्बल 280 टाके घातले आहेत. तिच्या उपचारांसाठी लागणारा दोराच 22,000 रुपयांचा लागला आहे.
पीडितेने आपल्या अवस्थेबद्दल सांगताना असे म्हटले की, “माझ्यावर इतके वार झाले की डॉक्टरांना माझे अंग अक्षरशः गोधडीसारखे शिवावे लागले. या जखमांमुळे असह्य वेदना होत आहेत, पण रडूही शकत नाही. कारण डोळ्यांतून गळणारे अश्रू जखमांवर पडले तर आणखी आग होईल.” या भयंकर घटनेने परिसरात खळबळ उडाली आहे. (Chhatrapati Sambhaji Nagar Crime )
