“मशिदीत जाणं बंद करु नका, मरण्यासाठी मशिदीसारखी दुसरी चांगली जागा नाही”

By Babita.Durande On April 1, 2020 1:09 pm

नवी दिल्ली | देशात कोरोनामुळे भीतीचं वातावरण असताना तबलिगी जमात आणि मरकज चर्चेचा विषय ठरला आहे. याच जमातीच्या एका मौलवींचा एक ऑडिओ सध्या सोशल मीडियावर जोरदार व्हायरल होत आहे.

मरण्यासाठी मशिदीपेक्षा चांगली जागा नाही, असं वक्तव्य मरकजचे अध्यक्ष मौलाना साद यांनी केलं आहे. व्हायरल झालेल्या ऑडिओमध्ये मौलाना साद यांचा आवाज ऐकू येत आहे. तसेच या दरम्यान काही लोक खोकतानाही ऐकू येत असून त्याकडे लक्ष दिलं नसल्याची धक्कादायक माहिती समोर येत आहे.

मशिदीमध्ये जमा होण्यानं आजार होईल, हा विचारही मूर्खपणाचा आहे. अल्लाहवर विश्वास ठेवा. कुराण वाचत नाहीत आणि वर्तमानपत्रं वाचतात आणि घाबरून पळत सुटतात. अल्लाह यासाठीच काहीतरी अडचणी निर्माण करतो, कारण त्याला पाहायचं असतं की अशा परिस्थितीत माझा बंदा काय करतो?, असं मौलाना साद म्हणाले.

दरम्यान, जर कुणी म्हणत असेल की मशिदी बंद करायला हव्यात, त्यांना टाळं लावायला हवं, कारण हा आजार वाढत जाईल तर हा विचार तुमच्या मनातून काढून टाका, असं देखील मौलाना साद यांनी म्हटल्याचं या ऑडिओ क्लिपमध्ये ऐकायला येत आहे.