Devendra Fadnavis | मुख्यमंत्री, विरोधीपक्ष नेता आणि उपमुख्यमंत्री अशी सर्व पदे भूषवलेले भाजपचे नेते देवेंद्र फडणवीस यांनी आज (5 डिसेंबर) मुंबईतील आझाद मैदानावर मुख्यमंत्री पदाची शपथ घेतली. यावेळी पंतप्रधान नरेंद्र मोदी, केंद्रीय गृहमंत्री अमित शाह यांच्यासह अनेक दिग्गजांची उपस्थिती होती. अनेक राज्यातील मुख्यमंत्ऱ्यांच्या उपस्थितीत महायुती सरकारचा आज शपथविधी पार पडला. देवेंद्र फडणवीस यांनी महाराष्ट्राचे 21 वे मुख्यमंत्री म्हणून शपथ घतली आहे. (Devendra Fadnavis)

तर, एकनाथ शिंदे आणि अजित पवार यांनी उपमुख्यमंत्रीपदाची शपथ घेतली. यावेळी अनेक दिग्गजांची उपस्थिती होती. देवेंद्र फडणवीस हे तिसऱ्यांदा मुख्यमंत्री बनले आहेत.

देवेंद्र फडणवीस यांचा राजकीय प्रवास-

देवेंद्र सरिता गंगाधरराव फडणवीस हे नाव आता महाराष्ट्राच्या राजकारणातील मोठं नाव बनलं आहे. फडणवीस यांची राजकीय सुरुवात ही भाजपशी संलग्न असलेल्या अखिल भारतीय विद्यार्थी परिषदेपासून झाली. ते या संघटनेचे सक्रिय सदस्य होते. त्यांनी प्रथम नागपूर महापालिका निवडणूक राम नगर प्रभागातून जिंकली. 1997 साली फडणवीस हे नागपूर महापालिकेचे सर्वात तरुण महापौर बनले.वयाच्या 29 व्या वर्षी ते महापौर बनले होते.

फडणवीस यांचे वडील गंगाधर फडणवीस हे नागपूरचे महाराष्ट्र विधान परिषदेचे सदस्य होते. तर, त्यांच्या आई सरिता या विदर्भ गृहनिर्माण महामंडळाच्या माजी संचालिका होत्या. फडणवीस यांचे शालेय शिक्षण हे तत्कालीन पंतप्रधान इंदिरा गांधी यांच्या नावावर असलेल्या इंदिरा कॉन्व्हेंटमध्ये झालं. देशात आणीबाणी लागली होती तेव्हा सरकारविरोधी आंदोलनात भाग घेतल्याने देवेंद्र फडणवीस यांच्या वडिलांना तुरुंगवास भोगावा लागला होता. ज्यांच्यामुळे वडील तुरुंगात गेले त्यांच्या नावावर असलेल्या शाळेत आपण शिकणार नाही, असं फडणवीस लहानपणी म्हणाले होते. यानंतर त्यांनी सरस्वती विद्यालयमधून शिक्षण घेतलं. संघर्षाची ही भावना त्यांच्यात लहानपणीच निर्माण झाली.पुढे नागपूरमधून त्यांनी कायद्याची पदवी घेतली. (Devendra Fadnavis)

1997 मध्ये महापौर बनल्यानंतर फडणवीस यांनी पहिल्यांदा 1999 मधून पश्चिम नागपूर विधानसभा लढली आणि जिंकलीसुद्धा. या मतदारसंघातून ते सलग दोनदा आमदार झाले. त्यानंतर ते दक्षिण-पश्चिम विधानसभा मतदारसंघातून चारवेळा विजयी झाले. 1999 पासून ते महाराष्ट्र राज्याच्या विधानसभेत नागपूरचे प्रतिनिधित्व करत आहेत. 2013 मध्ये फडणवीस हे भाजपचे महाराष्ट्र प्रदेश अध्यक्ष झाले. 2014 मध्ये देशात मोदी लाट आली. महाराष्ट्रातील यशामागे फडणवीस यांनीही खूप मेहनत घेतली होती. 2014 मध्ये भाजपाच्या आमदारांनी त्यांची विधीमंडळ पक्षनेते पदी निवड केली.

तिसऱ्यांदा फडणवीसांनी घेतली मुख्यमंत्रीपदाची शपथ

31 ऑक्टोबर 2014 साली देवेंद्र फडणवीस हे पहिल्यांदा मुख्यमंत्री बनले. राष्ट्रवादी काँग्रेसचे शरद पवार यांच्यानंतर ते महाराष्ट्राचे सर्वात तरुण मुख्यमंत्री ठरले होते. 2014 ते 2019 ही 5 वर्षे फडणवीस मुख्यमंत्रीपदी होते. 2019 च्या निवडणुकीत भाजप-शिवसेना युती होती. त्यात भाजप आणि शिवसेनेला मोठं यश मिळालं. मात्र, उद्धव ठाकरे यांनी भाजपशी युती तोडत कॉँग्रेस आणि राष्ट्रवादी कॉँग्रेससोबत आघाडी केली. याचवेळी 23 नोव्हेंबर 2019 मध्ये फडणवीस यांनी अजित पवार यांना सोबत घेऊन सरकार स्थापन केले. तेव्हा सकाळी 5 वाजता दोघांनी शपथ घेतली होती. हा पहाटेचा शपथविधी अजूनही महाराष्ट्राच्या राजकारणात गाजत असतो. मात्र, हे सरकार टिकलं नाही. यानंतर अडीच वर्ष राज्यात महाविकास आघाडीचं सरकार स्थापन झालं.

मात्र, 2021 मध्ये शिवसेनामध्ये बंडखोरी झाली.एकनाथ शिंदे यांनी 40 आमदारांसोबत भाजपशी हातमिळवणी केली. तेव्हा एकनाथ शिंदे हे मुख्यमंत्री तर देवेंद्र फडणवीस (Devendra Fadnavis) हे उपमुख्यमंत्री बनले. आता नुकत्याच झालेल्या विधानसभा निवडणुकीत भाजपाला 132 जागांवर यश मिळालं आहे. राज्यात पुन्हा एकदा महायुतीचं सरकार स्थापन झालं आहे. यावेळी देवेंद्र फडणवीस हे तिसऱ्यांदा मुख्यमंत्री बनले आहेत. आज त्यांनी मुख्यमंत्रीपदाची शपथ घेतली.

News Title –  Devendra Fadnavis took oath as Chief Minister of Maharashtra

महत्त्वाच्या बातम्या : 

सलमान खान ते सचिन तेंडुलकर..; महायुतीच्या शपथविधीला दिग्गजांची मांदियाळी

उदय सामंतांकडून सर्वात मोठा गौप्यस्फोट, म्हणाले “एकनाथ शिंदेंचं पत्र घेऊन आम्ही…”

राज्याच्या इतिहासात ‘हे’ कधीच घडलं नाही, फडणवीस एकमेव जे…

अजितदादांच्या राष्ट्रवादीने किती मंत्रीपदं मागितली? बड्या नेत्यानी संख्याच सांगितली

“एकनाथ शिंदेंना डावलून कुणी काही करत असेल, तर…”; ‘या’ नेत्याचा थेट इशारा