Omraje Nimbalkar | राज्यात ‘ऑपरेशन टायगर’च्या चर्चांनी जोर धरला आहे. शिवसेना (उद्धव ठाकरे गट) चे सहा खासदार शिंदे गटात सामील होण्याची शक्यता वर्तवली जात आहे. त्यात धाराशिवचे (Dharashiv) ठाकरे गटाचे खासदार ओमराजे निंबाळकर (Omraje Nimbalkar) यांचे नावही पुढे येत आहे. या चर्चेमुळे ठाकरे गटाला मोठा फटका बसण्याची शक्यता व्यक्त होत आहे.

नुकत्याच पार पडलेल्या धाराशिव जिल्हा नियोजन समितीच्या बैठकीत परिवहन मंत्री प्रताप सरनाईक (Pratap Sarnaik) यांनी ओमराजे निंबाळकर यांच्याकडे बोट दाखवत, “ते महायुतीचेच आहेत,” असे विधान केले. सरनाईक यांच्या या वक्तव्यावर ओमराजेंनी हसून प्रतिसाद दिल्याने, त्यांच्या शिवसेना (शिंदे गट) प्रवेशाबाबत चर्चा रंगल्या आहेत.

सरनाईक यांच्या सूचक विधानांमुळे चर्चांना उधाण

धाराशिवमध्ये जिल्हा नियोजन समितीच्या बैठकीत राष्ट्रवादीचे आमदार विक्रम काळे (Vikram Kale) यांनी पालकमंत्र्यांचे स्वागत केले. यावेळी प्रताप सरनाईक यांनी खासदार ओमराजे निंबाळकर यांच्याकडे बोट दाखवत सूचक विधान केलं की, “ओमराजे महायुतीचेच आहेत.” ओमराजेंनी (Omraje Nimbalkar) या वक्तव्याला हसून प्रतिसाद दिला, ज्यामुळे त्यांच्या भविष्यातील राजकीय हालचालींवर अनेक तर्क-वितर्क लावले जात आहेत.

सरनाईक यांनी यावर प्रतिक्रिया देत म्हटले की, “धाराशिवमध्ये येत्या काळात एखादा राजकीय भूकंप झाला तर त्यात काही वावगं ठरणार नाही.” या विधानानंतर ओमराजेंच्या शिवसेना (शिंदे गट) प्रवेशाबाबतच्या चर्चांना आणखी बळ मिळालं आहे.

ओमराजे निंबाळकर यांची भूमिका गूढ

या चर्चांच्या पार्श्वभूमीवर ओमराजे निंबाळकर मात्र कोणतीही स्पष्ट भूमिका मांडायला तयार नाहीत. त्यांनी बोलण्यास नकार दिल्यामुळे त्यांच्या उद्धव ठाकरे यांची साथ सोडण्याच्या शक्यतेवर चर्चेला उधाण आलं आहे. या घडामोडींचा व्हिडिओ सोशल मीडियावर व्हायरल होत आहे.

ठाकरे गटात फूट पडण्याचा धोका

‘ऑपरेशन टायगर’ अंतर्गत मुंबईतील एक आणि ग्रामीण भागातील पाच खासदार शिंदे गटात सामील होण्याच्या तयारीत असल्याचं म्हटलं जात आहे. यामध्ये ओमराजे निंबाळकर (Omraje Nimbalkar) यांचं नाव समोर आलं आहे. जर हे घडलं, तर धाराशिवमधील ठाकरे गटाला मोठा फटका बसेल आणि महायुतीची ताकद अधिक वाढेल.

Title : Dharashiv Politics Will Omraje Nimbalkar Join Shinde Faction