ड्रेसिंग रूममध्ये काय घडलं?, गुपित उघड, गंभीरच्या आरोपाने खळबळ

January 17, 2025

Gautam Gambhir l भारतीय क्रिकेट संघाचे (Indian Cricket Team) प्रशिक्षक गौतम गंभीर यांनी एक खळबळजनक आरोप केला आहे. बॉर्डर गावसकर चषक मालिकेतील (Border Gavaskar Trophy) मेलबर्न कसोटीतील पराभवानंतर ड्रेसिंग रूममध्ये झालेल्या संघाच्या चर्चेचा तपशील सरफराज खानने उघड केल्याचा आरोप गंभीर यांनी केला आहे. या आरोपामुळे भारतीय क्रिकेटविश्वात खळबळ माजली आहे. विशेष म्हणजे, सरफराज या कसोटी मालिकेतील सर्व पाच सामन्यांमध्ये राखीव खेळाडू (Reserve Player) म्हणून बाहेर बसला होता.

मिळालेल्या माहितीनुसार, गंभीर यांनी नुकतीच मुंबईत बीसीसीआयच्या (BCCI) पदाधिकाऱ्यांसोबत एक बैठक घेतली. या बैठकीत कर्णधार रोहित शर्मा (Rohit Sharma) आणि मुख्य निवडकर्ते अजित आगरकर (Ajit Agarkar) हेदेखील उपस्थित होते. याच बैठकीत गंभीर यांनी सरफराजवर हा गंभीर आरोप केल्याचे समजते.

Gautam Gambhir l गंभीर यांच्यावर चाहत्यांचा निशाणा

गंभीर यांनी सरफराज खानवर आरोप केल्यानंतर सोशल मीडियावर (Social Media) त्यांच्यावर टीकेची झोड उठली आहे. “गंभीर आता सरफराजची कारकीर्द संपवूनच शांत बसणार,” असे एका चाहत्याने म्हटले आहे. तर, “पराभवाच्या टीकेपासून वाचण्यासाठी गंभीर यांनी सरफराजला बळीचा बकरा बनवले आहे,” असा आरोप दुसऱ्या एका चाहत्याने केला. “गंभीर प्रशिक्षक असेपर्यंत सरफराजला अंतिम ११ काय, तर १५ खेळाडूंमध्येही स्थान मिळण्याची शक्यता नाही,” असे भाकीत एका चाहत्याने वर्तवले आहे.

ड्रेसिंग रूममध्ये काय झाले होते?

‘बॉक्सिंग डे’ (Boxing Day) कसोटीत परिस्थितीनुसार खेळ न केल्याने गंभीर खूप रागावले होते. तसेच, फलंदाजांनी (Batsmen) परिस्थितीनुसार खेळ न करता आपला नैसर्गिक खेळ केल्यामुळे संघ पराभवाच्या खाईत लोटला गेला, याचाही राग गंभीर यांच्या मनात होता. या पराभवानंतर गंभीर यांनी खेळाडूंना धमकी दिली होती की, “एकतर खेळाडूंनी त्यांच्या योजनेनुसार खेळावे, नाहीतर संघाबाहेर बसावे.” मिळालेल्या माहितीनुसार, ड्रेसिंग रूममध्ये गंभीर खेळाडूंवर रागावल्या प्रकरणाची चर्चा सरफराज खानने कथित रूपाने उघड केली होती, असा आरोप आहे.

या आरोपामुळे आता सरफराजच्या कारकिर्दीवर प्रश्नचिन्ह निर्माण झाले आहे. गंभीर यांच्यासारख्या प्रभावशाली व्यक्तीच्या विरोधात जाणे सरफराजला महागात पडण्याची शक्यता आहे.