Khushi Kapoor l खुशी कपूर (Khushi Kapoor) हिने कॉस्मेटिक सर्जरी आणि प्लास्टिक सर्जरीसंदर्भात स्पष्ट भूमिका मांडली आहे. तिने स्वतः नाकाची सर्जरी केल्याची कबुली यापूर्वी दिली होती, ज्यामुळे तिला सोशल मीडियावर ट्रोलिंगचा सामना करावा लागला होता. मात्र, यामुळे खचून न जाता खुशीने प्लास्टिक सर्जरीवर मोकळेपणाने चर्चा केली आहे. तिच्या मते, सुंदर दिसण्यासाठी हे सामान्य आहे आणि त्यात वाईट काहीही नाही.

खुशीने एका मुलाखतीत नॅनो-ब्लेड ट्रिटमेंट आणि कॉस्मेटिक सर्जरीसंदर्भात आपले अनुभव शेअर केले. ती म्हणाली, “माझ्या भुवयांवर नॅनो-ब्लेड प्रक्रिया केली. कारण काही जागी केसांमध्ये अंतर दिसत होतं. हे केल्यानंतर काही दिवस भुवयांना पाणी लावता येत नाही.” याशिवाय, प्लास्टिक सर्जरीसंदर्भात सत्य स्वीकारण्याचे महत्त्वही तिने अधोरेखित केले.

ट्रोलिंग आणि सौंदर्य मानकांवर खुशीची प्रतिक्रिया :

खुशी कपूरला सोशल मीडियावर ट्रोल करून ‘प्लास्टिक’ म्हटले गेले. याबद्दल ती म्हणाली, “तुम्ही ट्रोल व्हाल, हे माहीत असूनही तुम्हाला सत्य सांगण्याची गरज आहे. लोक तुम्हाला कोणत्याही कारणाने ट्रोल करतात. प्लास्टिक सर्जरी किंवा कॉस्मेटिक सर्जरी ही फार मोठी गोष्ट नाही. मात्र, लोकांनी त्यावर नकारात्मक प्रतिक्रिया दिली, तरीही मी खऱ्या गोष्टींचा स्वीकार केला.”

तिने सौंदर्याबाबत अवास्तव मानके प्रस्थापित करण्याविषयी चिंता व्यक्त केली. ती म्हणाली, “काही लोक सर्जरी करून नैसर्गिक सुंदरतेचा दावा करतात, जे चुकीचं आहे. त्यामुळे तरुण मुलींना वाटतं की, मी अशी का दिसत नाही? त्यांनी त्यांच्या सुंदरतेसाठी अनेक उपाय केलेले असतात. त्यामुळे कलाकारांनी आपल्या चाहत्यांशी प्रामाणिक राहायला हवं.”

Khushi Kapoor l प्रामाणिकपणाची भूमिका आणि चाहत्यांसाठी संदेश :

खुशी कपूरने तिच्या चाहत्यांसोबत प्रामाणिक राहण्याचं महत्त्व अधोरेखित केलं. “तुमचं सत्य स्वीकारणं महत्त्वाचं आहे, कारण लोकांना कधीही कोणत्याही कारणाने तुम्हाला नापसंती दाखवायचीच असते. मी ट्रोलिंगला उत्तर देताना स्पष्टपणे सांगितलं की, माझ्यासाठी प्लास्टिक सर्जरी ही मोठी गोष्ट नाही,” असं ती म्हणाली.

खुशीच्या या खुलाशामुळे कलाविश्वातील सौंदर्य मानकांवर नवा विचार होण्याची शक्यता आहे. तिने सौंदर्याच्या मागे लपलेल्या वास्तवाचा स्वीकार करत, चाहत्यांसाठी प्रामाणिक राहण्याचा आदर्श घालून दिला आहे.

News Title: Khushi Kapoor Opens Up About Cosmetic Surgery and Beauty Standards