Central Bank l अमरावती जिल्ह्यातील चांदूर रेल्वे येथे असलेल्या सेंट्रल बँकेत भीषण आग लागल्याने संपूर्ण परिसरात मोठी खळबळ उडाली आहे. ही आग शॉर्टसर्किटमुळे लागल्याचा प्राथमिक अंदाज व्यक्त केला जात आहे. आगीमुळे बँकेतील महत्वाची कागदपत्रे, पैशांचा साठा आणि अन्य साहित्य जळून खाक झाले आहे. सुदैवाने या घटनेत कोणतीही जीवितहानी झालेली नाही. मात्र, या घटनेमुळे परिसरात मोठ्या प्रमाणावर नागरिकांनी गर्दी केली असून, प्रशासनावर त्वरित उपाययोजनांचे दबाव वाढले आहे.
आग आटोक्यात आणण्यासाठी प्रयत्न :
घटनेची माहिती मिळताच चांदूर रेल्वे अग्निशमन दलाने घटनास्थळी धाव घेतली. मात्र, आग आटोक्यात न आल्याने धामणगाव आणि तीवसा येथून अतिरिक्त अग्निशमन बंब मागवण्यात आले. शर्तीचे प्रयत्न करून आग विझवण्यात आली, परंतु तोपर्यंत संपूर्ण बँक जळून खाक झाली होती. घटनेच्या ठिकाणी पोलिसांनी बंदोबस्त वाढवला असून, आगीच्या नेमक्या कारणांचा तपास सुरू आहे.
याच दरम्यान, गोंदिया जिल्ह्याच्या देवरी तालुक्यातील अब्दुलटोला येथे एका घराला आग लागून 14 ते 15 चारचाकी वाहने जळून खाक झाल्याची घटना घडली. स्थानिक रहिवाशांच्या माहितीनुसार, जंगल परिसरात कोणी तरी अज्ञात व्यक्तीने आग लावली होती. ही आग पसरत व्यावसायिक छोटू खान यांच्या शेतातील घरात पोहोचली आणि त्यात ठेवलेली वाहने पूर्णतः जळून खाक झाली.
Central Bank l गावांमध्ये उन्हाळ्यात आगीचा धोका वाढतो :
गोंदिया आणि अमरावती जिल्ह्यात उन्हाळ्याच्या दिवसांत अनेक भागांत वणव्याच्या घटना वारंवार घडत असतात. स्थानिक शेतकरी मोहफुल गोळा करताना झाडाखाली कचरा जाळतात, त्यामुळेही मोठ्या प्रमाणात आग लागण्याच्या घटना घडतात. प्रशासनाने अशा आगी रोखण्यासाठी उपाययोजना करण्याची मागणी नागरिकांकडून केली जात आहे.
या दोन्ही आगींच्या घटनांनंतर स्थानिक पोलिस आणि प्रशासन सतर्क झाले असून, शॉर्टसर्किट आणि मानवी हलगर्जीपणा याचा सखोल तपास केला जात आहे. अमरावती आणि गोंदिया जिल्ह्यातील नागरिकांना प्रशासनाकडून सतर्कतेच्या सूचना दिल्या जात आहेत.
