MHADA Mumbai | मुंबईत गगनाला भिडलेल्या घरांच्या किंमतींमुळे सर्वसामान्य माणसासाठी स्वतःचं घर घेणं स्वप्नवत बनलं आहे. मात्र लवकरच म्हाडा सर्वसामान्यांसाठी परवडणाऱ्या घरांच्या किमती जाहीर करण्याच्या तयारीत आहे. यासाठी विशेष त्रिसदस्यीय समितीची नियुक्ती करण्यात आली असून निर्णय अंतिम टप्प्यात पोहोचत आहे.
नव्या दररचनेतून मिळणार दिलासा?
मुंबईतील वाढत्या घरांच्या किमती लक्षात घेता, म्हाडाच्या (MHADA) घरांचाही खर्च सामान्यांच्या आवाक्याबाहेर गेला आहे. हे लक्षात घेऊन म्हाडाने घराच्या किमती कशा पद्धतीने निश्चित कराव्यात, यासाठी त्रिसदस्यीय अभ्यास समिती स्थापन केली आहे. ही समिती अशा प्रकारे सूत्र तयार करणार आहे की ज्यामुळे एकीकडे घरं परवडतील आणि दुसरीकडे म्हाडालाही तोटा होणार नाही.
समितीने तीन महिन्यांत आपला अहवाल म्हाडाचे उपाध्यक्ष यांच्याकडे सादर करायचा आहे. त्यानंतर राज्य सरकारकडून त्याला मंजुरी मिळाल्यानंतर नवीन दररचना लागू होईल. सध्या म्हाडा जमिनीचा दर, बांधकाम खर्च, आस्थापन खर्च आणि इतर संबंधित बाबींचा विचार करून घरांच्या किंमती ठरवतो. अत्यल्प आणि अल्प उत्पन्न गटासाठी म्हाडा नफा न घेता घरे विकतो, तर मध्यम उत्पन्न गटासाठी 10% आणि उच्च उत्पन्न गटासाठी 15% नफा घेतो. मात्र एखाद्या भूखंडावर उशीराने बांधकाम झालं असेल किंवा सुरक्षा खर्च वाढला असेल तर तो सर्वसामान्यांकडून वसूल केला जातो, हीच पद्धत आता पुन्हा विचाराधीन आहे.
क्षेत्रफळाऐवजी किंमतीनुसार वर्गीकरण?
म्हाडाच्या सध्याच्या धोरणानुसार 300 चौरस फुटापर्यंतची घरे अत्यल्प, 450 पर्यंत अल्प, 600 पर्यंत मध्यम आणि 900 चौरस फुटांपर्यंतची घरे उच्च उत्पन्न गटासाठी आरक्षित असतात. मात्र उपनगरांतील 300 चौरस फुटांचं घर आणि दक्षिण मुंबईतील तेवढ्याच क्षेत्रफळाचं घर यामध्ये प्रचंड दरफरक असतो.
म्हणूनच आता क्षेत्रफळाऐवजी थेट घराच्या किंमतीनुसार उत्पन्न गट ठरवता येईल का, यावर समिती विचार करत आहे. यामुळे अधिक न्याय्य वाटप होण्याची शक्यता आहे. आर्थिकदृष्ट्या दुर्बल घटकांपर्यंत परवडणारी घरे पोहोचवण्यासाठी म्हाडाने उचललेलं हे पाऊल मुंबईतील घर खरेदीचं स्वप्न साकार करायला मदत करणार आहे.
Title : MHADA Mumbai Affordable Housing Plan Soon
