केंद्र सरकारचा कुठलाही मंत्री येत्या काही दिवसांत परदेशात जाणार नाही- नरेंद्र मोदी

By Babita.Durande On March 13, 2020 12:39 pm

नवी दिल्ली | कोरोना विषाणूच्या संसर्गाची साखळी तोडण्यासाठी, अत्यावश्यक असल्याशिवाय प्रवास करणं आणि मोठय़ा संख्येत एकत्र येणं टाळावं, असं आवाहन पंतप्रधान नरेंद्र मोदी यांनी लोकांना केलं. सध्याच्या परिस्थितीबाबत आपलं सरकार पूर्णपणे दक्ष असल्याचंही मोदींनी सांगितलं आहे.

सर्वाची सुरक्षितता सुनिश्चित करण्यासाठी सर्व मंत्रालयांनी आणि राज्यांनी नानाविध उपाययोजना केल्या आहेत. व्हिसा स्थगित करण्यापासून ते आरोग्यविषयक क्षमता वाढवण्यापर्यंतच्या उपायांचा यात समावेश आहे, असं नरेंद्र मोदींनी म्हटलं आहे.

घाबरून जाऊ नका, पण खबरदारी नक्कीच घ्या. केंद्र सरकारचा कुठलाही मंत्री येत्या काही दिवसांत परदेशात जाणार नाही. अत्यावश्यक असल्याशिवाय प्रवास टाळा, असं आवाहन मी देशवासीयांना करतो, असंही मोदी यांनी ट्विटरवरील संदेशात सांगितलं.

दरम्यान, मोठ्या संख्येत एकत्र येणं टाळून आपण करोना विषाणूच्या संसर्गाची साखळी तोडू शकतो आणि सर्वाची सुरक्षितता निश्चित करू शकतो, असं नरेंद्र मोदी यांनी म्हटलंय.

ट्रेंडिंग बातम्या-