अपघात झाल्यास कंत्राटदारांची खैर नाही…; नितीन गडकरी मोठा निर्णय घेणार

January 17, 2025

Nitin Gadkari | देशात खराब रस्त्यांमुळे अनेक ठिकाणी निष्पाप नागरिकांचे बळी जात आहेत. ही गंभीर समस्या सोडवण्यासाठी केंद्रीय रस्ते वाहतूक आणि महामार्ग मंत्री नितीन गडकरी यांनी कडक धोरण अवलंबण्याचे संकेत दिले आहेत. खराब रस्ते बांधल्यास तो अजामीनपात्र गुन्हा ठरवण्यात यावा आणि अपघातांसाठी रस्ते कंत्राटदार (Road Contractors) आणि अभियंते (Engineers) यांना जबाबदार धरून त्यांना तुरुंगात पाठवावे, असे गडकरी (Nitin Gadkari ) यांनी गुरुवारी स्पष्ट केले.

सीआयआय (CII) या उद्योग संघटनेच्या कार्यक्रमात बोलताना गडकरी म्हणाले, “रस्ते अपघातांमध्ये भारत जगात पहिल्या क्रमांकावर आहे. ही परिस्थिती बदलण्यासाठी, खराब रस्ते बांधकाम हा अजामीनपात्र गुन्हा ठरवण्यात यावा आणि अपघातांसाठी रस्ते कंत्राटदार आणि अभियंते यांना जबाबदार धरून तुरुंगात पाठवले जावे.” मंत्रालयाने २०३० पर्यंत रस्ते अपघातातील मृत्यू निम्म्यावर आणण्याचे उद्दिष्ट ठेवले आहे, असेही त्यांनी नमूद केले.

प्रशिक्षण आणि फिटनेस केंद्रांवर भर

वाहनचालकांच्या (Drivers) तीव्र कमतरतेवर मात करण्यासाठी प्रशिक्षण आणि फिटनेस केंद्रे स्थापन होणे आवश्यक असल्याचे मत गडकरी यांनी व्यक्त केले. यासाठी उद्योग आणि इतर संबंधित घटकांनी सरकारसोबत भागीदारी करावी, असे आवाहनही त्यांनी (Nitin Gadkari ) केले.

अपघातांची दाहक आकडेवारी

२०२३ मध्ये देशात पाच लाख रस्ते अपघात झाले. या अपघातांमध्ये १ लाख ७२ हजार लोकांचा मृत्यू झाला. मृतांमध्ये ६६.४ टक्के म्हणजेच १,१४,००० जण हे १८ ते ४५ वयोगटातील होते, तर १० हजार शाळकरी मुले होती.

गडकरींच्या या आक्रमक पवित्र्यामुळे रस्ते बांधकामातील निष्काळजीपणाला आळा बसण्याची आणि अपघातांचे प्रमाण कमी होण्याची शक्यता निर्माण झाली आहे. (Nitin Gadkari )