काही होणार नाही; प्रकरण वाझे साहेबांकडेच आहे; मनसुख हिरेन यांचं भावासोबतचं संभाषण ‘एनआयए’कडे

By टीम थोडक्यात On March 22, 2021 5:54 pm

मुंबई | मनसुख हिरेन मृत्यू प्रकरणाचा तपास जवळपास पूर्ण झाला आहे. ‘एटीएस’ कडून लवकरच याबद्दलची अधिकृत माहिती दिली जाऊ शकते. ‘एटीएस’चे प्रमुख जयजीत सिंह यांनी आज गृहमंत्री अनिल देशमुख यांचीही भेट घेतली. ‘एटीएस’चा तपास जवळपास पूर्ण झाला असताना मनसुख हिरेन आणि त्यांचे भाऊ विनोद यांच्यात झालेलं एक फोन संभाषण समोर आलं आहे.

25 फेब्रुवारीला उद्योगपती मुकेश अंबानी यांच्या मुंबईतील घराबाहेर स्फोटकांनी भरलेली स्कॉर्पिओ आढळून आली होती. ही स्कॉर्पिओ मनसुख हिरेन यांच्या मालकीची होती. त्यानंतर 27 फेब्रुवारीला मनसुख हिरेन आणि त्यांचे भाऊ विनोद यांच्यात फोनवरुन संभाषण झालं.

संभाषणाची रेकॉर्डिग ‘एटीएस’ आणि ‘एनआयए’कडे आहे. या संवादातून अनेक महत्त्वाच्या गोष्टी समोर येत आहेत. टीव्ही 9 या वृत्तवाहिनीनं याबद्दलचं वृत्त दिलं आहे.

मनसुख हिरेन आणि विनोद यांच्यातील संभाषण –

विनोद- झोप झाली का? काय झालं?

मनसुख- माझा जबाब नोंदवून घेतला. आता पुन्हा जावं लागणार नाही.

विनोद- जबाबात काय लिहून घेतलं? ती गाडी सचिन वाझेही चालवायचे हे जबाबात सांगितलंस ना?

मनसुख- नाही, मी जबाबात तसं म्हटलं नाही.

विनोद- का नाही सांगितलंस?

मनसुख- ती गाडी मी चालवतो हे कोणालाही सांगू नकोस, असं सचिन वाझेंनी सांगितलं होतं. त्यामुळे मी जबाब नोंदवताना तशी माहिती दिली नाही.