Maharashtra l राज्यातील राजकीय वातावरण पुन्हा एकदा तापलं आहे. मंत्री संजय शिरसाट (Sanjay Shirsat) यांनी एका कार्यक्रमात केलेल्या थेट आणि रोखठोक विधानांमुळे राजकीय वर्तुळात खळबळ उडाली आहे. मंत्रीपदावर असताना घेतलेले निर्णय, त्यांना मिळालेली टीका आणि त्यावर दिलेली प्रत्युत्तरं यामुळे त्यांनी विरोधकांवर जोरदार निशाणा साधला. शिरसाट यांनी आपल्या भाषणात नामोल्लेख न करता काही नेत्यांवर गंभीर आरोप करत राजकीय चर्चेचा विषय बनवलं आहे.

संजय शिरसाट यांनी आपल्या राजकीय संघर्षाचा उल्लेख करत, पालकमंत्री पद मिळाल्याच्या अनुभवाबाबत वक्तव्य केलं. त्यांनी सांगितलं की, “पालकमंत्री होणं हे माझ्यासाठी एक स्वप्नवत क्षण होता.” मंत्रीपदाची शपथ घेताना ते खूप तणावाखाली होते, असं त्यांनी स्पष्ट केलं. “शपथ घेताना माझे हात-पाय लटपटत होते,” अशी कबुली देतानाच त्यांनी आपल्या कार्यप्रणालीवर टीका करणाऱ्यांना उत्तर दिलं. “बंडखोरीनंतर आम्हाला ‘गद्दार’ म्हटलं, ‘पन्नास खोके’ अशी उपहासात्मक टीका झाली. पण आम्ही निवडणुकीत नक्की यश मिळवणार याचा विश्वास होता,” असं सांगून त्यांनी आपल्या भूमिकेचं समर्थन केलं.

विरोधकांवर शिरसाटांचा निशाणा :

शिरसाट यांनी आपल्या भाषणात नाव न घेता ठाकरे गटाचे (Thackeray Group) नेते अंबादास दानवे (Ambadas Danve) आणि मंत्री अब्दुल सत्तार (Abdul Sattar) यांच्यावर जोरदार टीका केली. “मातोश्रीकडून (Matoshree) विचारणा झाली होती की, आमच्या पक्षाचा उमेदवार कोण? पण तुम्हाला सिल्वर ओकवर (Silver Oak) का जावं लागतं?” असा खोचक सवाल करत त्यांनी ठाकरे गटाला लक्ष्य केलं. याशिवाय, त्यांनी शिंदे गटाला (Shinde Group) समर्थन देताना म्हटलं की, “शिंदे साहेबांनी मला विश्वासात घेऊन प्रत्येक निर्णय घेतला.”

तसेच, त्यांनी त्यांच्या पालकमंत्रीपदाच्या कार्यकाळात येणाऱ्या अडचणींवर भाष्य करत, “दादागिरीचे वारे सुरू आहेत. पण आम्ही ते थांबवू,” असा स्पष्ट इशारा दिला. “या शहराला लागलेली एक कीड आपण संपवली आहे. आता दुसरी कीड संपवण्याची वेळ आली आहे,” असं सांगत त्यांनी सत्तार यांच्यावर निशाणा साधला.

Maharashtra l टीकेला जोरदार प्रत्युत्तर :

संजय शिरसाट यांनी त्यांच्या विरोधकांवर तिखट शब्दांत टीका केली. “काही लोक आमच्या वाढदिवस साजरे करण्यावर टीका करतात, पण आमच्या नादाला लागाल तर आम्ही सोडणार नाही,” असं ते म्हणाले. त्यांनी अब्दुल सत्तार यांच्यावर नाव न घेता हल्ला चढवत, “बांगड्या भरा साल्यानो,” अशी आक्रमक भाषा वापरली. त्यांच्या या विधानांमुळे राजकीय वर्तुळात पुन्हा चर्चा सुरू झाली आहे.

शिरसाट यांनी सांगितलं की, “मी पाच वर्षे पालकमंत्री राहणार आहे. मी माझं राज्य सरकारचं काम जिल्ह्यातून सांभाळणार आहे.” त्यांच्या या विधानांनी त्यांचा आत्मविश्वास स्पष्ट झाला. “दुसऱ्या पक्षाच्या उदयापेक्षा स्वतःच्या पक्षाचा अस्त टिकवण्याची काळजी घ्या,” असा सल्लाही त्यांनी अप्रत्यक्षरित्या विरोधकांना दिला.

News Title : Sanjay Shirsat’s Fiery Remarks Fuel Political Tensions