“आम्हाला न्याय हवाय”; देशमुख कुटुंबियांची शरद पवारांकडे मागणी

December 21, 2024

Sharad Pawar met Santosh Deshmukh family

Sharad Pawar | बीडमधील सरपंच संतोष देशमुख हत्या प्रकरणाला आता 13 दिवस उलटले आहेत. यावरून महाराष्ट्रातील राजकारण चांगलेच तापले आहे. मुख्यमंत्री देवेंद्र फडणवीस यांनी कालच, संतोष देशमुख हत्या प्रकरणी एसआयटी आणि न्यायालयीन चौकशी केली जाईल, अशी ग्वाही दिली. तर, आज (21 डिसेंबर) राष्ट्रवादी शरद पवार गटाचे प्रमुख ज्येष्ठ नेते शरद पवार (Sharad Pawar)यांनी मस्साजोग गावी भेट दिली.

शरद पवार यांनी आज संतोष देशमुख यांच्या कुटुंबाची भेट घेऊन त्यांच्याशी संवाद साधला. त्यांनी गावकऱ्यांकडून घटनेबाबत सगळी माहिती जाणून घेतली. यावेळी खासदार निलेश लंके , आमदार संदीप क्षीरसागर देखील उपस्थित होते. गावकऱ्यांसह देशमुख यांच्या कुटुंबाने शरद पवार यांच्याकडे न्याय मिळावा, अशी मागणी केली.

शरद पवारांनी घेतली देशमुख कुटुंबाची भेट

संतोष देशमुख यांच्या कन्या वैभवी देखमुख यांच्या शिक्षणाचा खर्च शरद पवार करणार असल्याची माहिती आहे. त्यांनी स्वतः कुटुंबाची भेट घेत सर्व अडचणी जाणून घेतल्या. संतोष देशमुख यांच्या कुटुंबाची जबाबदारी शरद पवार यांनी स्वीकारली. यावेळी वैभवी देखमुख यांनी सर्व आरोपींना लवकरात लवकर अटक व्हावी, अशी मागणी केली. (Sharad Pawar )

आमदार क्षीरसागर यांनी देखील यावेळी महत्वाची प्रतिक्रिया दिली. वाल्मीक कराडचे नाव घेत त्यांना अटक व्हावी, असं त्यांनी म्हटलं. वाल्मीक कराडनेच जिल्ह्याची वाट लावली, असा संताप यावेळी आमदार क्षीरसागर यांनी व्यक्त केला.

नेमकं प्रकरण काय?

बीडमधील मस्साजोग गावचे सरपंच संतोष देशमुख यांचे 9 डिसेंबररोजी अपहरण करण्यात आले, यानंतर त्यांची हत्या करण्यात आली. सरपंच हत्येनंतर केज आणि मस्साजोग या ठिकाणी गावकऱ्यांकडून मोठं आंदोलन उभारण्यात आलं. हा मुद्दा आता राजकारणात देखील पेटला आहे. विरोधी गटाकडून या प्रकरणी महायुती सरकारवर हल्लाबोल केला जातोय. अशात आज शरद पवार (Sharad Pawar) यांनी देशमुख कुटुंबाची भेट घेतली.