Shrikant Shinde | विधानसभेत मिळालेल्या अभूतपूर्व यशानंतर महायुतीमध्ये मुख्यमंत्री पद कुणाला मिळणार, याकडे अवघ्या राज्याचं लक्ष लागलेलं आहे. सीएम पदासाठी भाजपकडून देवेंद्र फडणवीस तर शिंदे गटाकडून एकनाथ शिंदे यांचे नाव आघाडीवर होते. मात्र, काल (27 नोव्हेंबर) झालेल्या पत्रकार परिषदेत एकनाथ शिंदे यांनी मुख्यमंत्रिपदासंदर्भातील निर्णय दिल्लीतील भाजपाचे ज्येष्ठ नेते घेतील आणि तो निर्णय आपल्याला मान्य असेल असं म्हणत मुख्यमंत्री पदावरील आपला दावा सोडला. (Shrikant Shinde)

एकनाथ शिंदेंनी पदावरील दावा सोडल्यानंतर राजकीय क्षेत्रातून विविध प्रतिक्रिया उमटल्या आहेत. शिंदे यांचे सुपुत्र खासदार श्रीकांत शिंदे यांनी सोशल मीडियावर एक भावनिक पोस्ट केली आहे. ‘माझे बाबा’ म्हणत श्रीकांत शिंदे यांनी वडिलांच्या कार्यकाळाचं कौतुक केलं.

श्रीकांत शिंदे यांची पोस्ट जशास तशी-

मला माझे बाबा आणि आमचे शिवसेना मुख्यनेते मा.ना.श्री.एकनाथजी शिंदे साहेब यांचा खूप अभिमान वाटतो. त्यांची महाराष्ट्र आणि येथील जनतेशी असलेली अतूट बांधिलकी अतुलनीय आहे. त्यांनी अहोरात्र अथक परिश्रम केले. समाजातील प्रत्येक घटकाची निस्वार्थ सेवा करून त्यांचे प्रेम, विश्वास आणि प्रशंसा मिळवली. ते स्वतःला ‘सीएम’ म्हणजे ‘कॉमन मॅन’ समजत. त्यांनी सर्वसामान्यांसाठी वर्षा बंगल्याचे दार उघडले आणि जनसेवेत एक नवा इतिहास घडवला. (Shrikant Shinde)

कारकिर्दीच्या शिखरावर असतानाही त्यांची नम्रता आणि कर्तव्यभावना दिसून येते. आज त्यांनी माननीय पंतप्रधान श्री. नरेंद्र मोदीजी आणि माननीय श्री. अमित शहाजी यांच्यावर विश्वास ठेवून, वैयक्तिक महत्त्वाकांक्षेपेक्षा युती धर्माचे पालन करत एक प्रगल्भ उदाहरण ठेवले आहे.

सत्ता आणि पद अनेकदा सार्वजनिक जीवनावर वर्चस्व गाजवते. भल्याभल्यांना मोहात पाडते, पण शिंदे साहेब अपवाद ठरले. त्यांच्यासाठी जनसेवा आणि राष्ट्रनिर्मिती हे नेहमीच सर्वोच्च प्राधान्य राहिले आहे आणि त्यांचा वारसा पुढील पिढ्यांना प्रेरणा देत राहील. गोर – गरिबांचा आशीर्वाद आणि सदिच्छा हीच शिंदे साहेबांची खरी संपत्ती आहे. खूप अभिमान वाटतो बाबा!, अशी पोस्ट श्रीकांत शिंदे (Shrikant Shinde)यांनी केली आहे.

मला माझे बाबा आणि आमचे शिवसेना मुख्यनेते मा.ना.श्री.एकनाथजी शिंदे साहेब यांचा खूप अभिमान वाटतो. त्यांची महाराष्ट्र आणि येथील जनतेशी असलेली अतूट बांधिलकी अतुलनीय आहे. त्यांनी अहोरात्र अथक परिश्रम केले. समाजातील प्रत्येक घटकाची निस्वार्थ सेवा करून त्यांचे प्रेम, विश्वास आणि प्रशंसा…

— Dr Shrikant Lata Eknath Shinde (@DrSEShinde) November 27, 2024