…तर मग पंतप्रधान नरेंद्र मोदींचाही राजीनामा घ्यावा- नाना पटोले

By टीम थोडक्यात On March 25, 2021 9:13 pm

Photo Credit- Facebook/ Narendra Modi, Nana Patole

मुंबई | मुंबईचे माजी पोलीस आयुक्त परमबीर सिंह यांनी केलेल्या लेटरबॉम्बवरून सध्या राज्यात खळबळ उडाली आहे. परमबीर सिंह यांनी राज्याचे गृहमंत्री अनिल देशमुख यांच्यावर धक्कादायक आणि गंभीर आरोप केले होते. सचिन वाझे यांना गृहमंत्र्यांनी मुंबईमधून 100 कोटी जमा करायला सांगितले असल्याचं परमबीर सिंग यांनी पत्रात म्हटलं होतं. यावरून विरोधकांनी अनिल देशमुखांच्या राजीनाम्याची मागणी जोर लावून धरली आहे. यावरून काँग्रेस प्रदेशाध्यक्ष काँग्रेसचे प्रदेशाध्यक्ष नाना पटोले यांनी भाजपला टोला लगावला आहे.

आरोप तर पंतप्रधान नरेंद्र मोदींवरही केले जातात. मग त्यांचाही राजीनामा घ्या आणि त्यांचीही चौकशी करा, असं नाना पटोले म्हणाले. मुंबईतील पत्रकार परिषदेत ते बोलत होते.

अंबानी आणि अदानीसाठी केंद्र सरकार काम करतंय हे सामान्य जनता बोलत आहे. मग आता पंतप्रधान नरेंद्र मोदींनीही राजीनामा द्यायला हवा आणि त्यांचीही चौकशी करायला हवी. लोकशाहीमध्ये जनता सर्वात मोठी असते असं आम्ही मानतो. ते लोक मानतात की नाही माहित नाही, असंही नाना पटोले यांनी म्हटलं आहे. यावेळी नानांनी फडणवीस मुख्यमंत्री असताना त्यांच्या मंत्रिमंडळातील मंत्र्यावर आरोप झाल्याची आठवण करून दिली.

दरम्यान, देवेंद्र फडणवीस जेव्हा राज्याचे मुख्यमंत्री होते. तेव्हा त्यांच्याही मंत्र्यांवर आरोप झाले होते. त्यावेळी फडणवीसांनी राजीनामे घेतले का?, फडणवीसच सर्वांना क्लिन चिट देत फिरत होते आणि तेच न्यायाधीश बनत होते, असं म्हणत पटोलेंनी फडणवीसांवरही निशाणा साधला.

थोडक्यात बातम्या-