Useless Car Features l ‘जितके साधे तितके चांगले’ असे म्हटले जाते आणि सामान्य जीवनात ते बऱ्याचदा खरेही ठरते. पण जेव्हा गोष्ट गाड्यांची येते, तेव्हा साधेपणा हा शब्द जणू काही कार कंपन्यांना मान्यच नसतो. ग्राहकाने मागणी केली नसतानाही अनेक अनावश्यक फीचर्स (Useless Features) गाडीमध्ये अक्षरशः ‘ठोसून’ भरलेली असतात. नाही, आम्ही आजकाल सामान्य गाड्यांमध्येही येणाऱ्या सनरूफबद्दल (Sunroof) बोलत नाही आहोत. कारण भारतात जिथे वर्षाचे ८-९ महिने कडक ऊन असते, तिथे सनरूफचा फारसा उपयोग नसतो, हे आता सर्वांनाच माहीत आहे. आम्ही अशा काही फीचर्सबद्दल बोलणार आहोत जे एका चांगल्या गाडीला ‘बे-कार’ (निरुपयोगी किंवा त्रासदायक) बनवतात आणि ज्यांचा उपयोग क्वचितच होतो, पण त्यासाठी मोठी किंमत मोजावी लागते.
अनावश्यक हाय-टेक फीचर्स?
या यादीतील पहिले फीचर म्हणजे वायरलेस चार्जर (Wireless Charger). जर तुमच्या गाडीत हा चार्जर असेल, तर आठवून पहा तुम्ही त्याचा शेवटचा वापर कधी केला होता? आठवत नाही ना? कारण ते विशेष कामाचे नसते. याचा चार्जिंग स्पीड गाडीच्या पहिल्या गिअरपेक्षाही कमी असतो, साधारणपणे १५ वॅटच्या आसपास. तुमचा फोन चार्ज होईपर्यंत तुम्ही तुमच्या ठरलेल्या ठिकाणी पोहोचलेले असता. त्यात फोन गरम होतो तो भाग वेगळाच. चला हेही मान्य केले, पण तुमच्याकडे वायरलेस चार्जिंग सपोर्ट करणारा फोन आहे का? कारण काही निवडक कंपन्यांचे मोजके मॉडेल्स वगळता अनेक फोन्समध्ये हे फीचरच नसते. त्यामुळे हे फीचर असून नसल्यासारखेच आहे.
दुसरे म्हणजे गाडीतील मोठी टचस्क्रीन (Touchscreen), जिने फिजिकल बटणांची (Physical Buttons) जागा घेतली आहे. आता सर्व कंट्रोल्स टच केल्यावरच काम करतात. एअर कंडिशनर (AC) किंवा म्युझिक सिस्टीमच्या आवाजासारख्या मूलभूत गोष्टींसाठी सुद्धा तुम्हाला स्क्रीनवरच लक्ष द्यावे लागते. यामुळे वेळ तर जातोच, पण हे धोकादायकही आहे, कारण तुमचे लक्ष रस्त्यावरून हटते. मोठी स्क्रीन, ज्यासाठी जास्त पैसे मोजावे लागतात, ती फारशी उपयोगी ठरत नाही. फिजिकल बटणांचा फायदा हा असतो की, बोटांना सवय झालेली असते की कोणते बटण कुठे आहे. गाडी चालवताना मोबाईलची स्क्रीन वापरल्यास दंड आहे, मग गाडीची स्क्रीन वापरल्यास का नाही, हा प्रश्नही पडतो.
Useless Car Features l त्रासदायक फीचर्स आणि त्यांचा खर्च
तिसरे फीचर आहे ऑटो इंजिन स्टार्ट-स्टॉप (Auto Engine Start-Stop). हे फीचर परदेशातील थंड हवामानासाठी ठीक असले तरी, भारतासाठी, जिथे वर्षाचे अनेक महिने प्रचंड गर्मी असते, ते निरुपयोगी ठरते. सिग्नलला थांबल्यावरही गाडीतील एसी सुरू ठेवावा लागतो. पण ऑटो-ऑफमुळे इंजिन बंद होते आणि एसीही बंद पडतो. सिग्नल सुटल्यावर गाडी पुन्हा सुरू केल्यावर इंजिनवर अतिरिक्त भार येतो आणि गाडी थंड व्हायलाही वेळ लागतो. जेवढे पेट्रोल वाचवले ते पुन्हा गाडी सुरू करण्यात आणि थंड करण्यात खर्च होते. चौथे आहे पॉवर्ड किंवा ऑटोमॅटिक टेलगेट (Powered Tailgate) म्हणजेच डिक्की. हल्ली सेन्सरच्या मदतीने डिक्की आपोआप उघडते. पण ही प्रक्रिया खूपच संथ असते. जेवढ्या वेळात ती हळू हळू उघडेल, तेवढ्या वेळात मॅन्युअली डिक्की उघडून सामान ठेवता येते.
पाचवे फीचर म्हणजे इलेक्ट्रिक सीट ऍडजस्टमेंट (Electric Seat Adjustment). सीट पुढे-मागे करण्यासाठी बटणे दिलेली असतात. पण जुन्या पद्धतीचा लिव्हर जास्त सोयीस्कर आणि प्रचंड वेगवान (‘अल्ट्रा फास्ट’) असतो. बटणांनी सीट ऍडजस्ट करणे हे संथ काम आहे. शिवाय, कालांतराने हे इलेक्ट्रिक सिस्टम खराब होण्याची शक्यता असते आणि दुरुस्तीचा खर्च मोठा असतो. इलेक्ट्रिक सीटच्या नावाखाली गाडीची किंमतही वाढते. त्यामुळे, जर तुम्हाला या फीचर्सशिवाय गाडी मिळत असेल आणि तुमचे काही पैसे वाचत असतील, तर त्यात काहीच वाईट नाही.
