लसींच्या अपुऱ्या पुरवठ्यामुळे आज मुंबईत लसीकरण बंद!

By Sayali.Zarad On August 13, 2021 11:03 am

मुंबई | कोरोना विषाणूमुळे सगळीकडे चिंताजनक परिस्थिती निर्माण झाली आहे. यातच कोरोना विषाणूच्या नवीन व्हेरिएंटनं धुमाकूळ घालत धोका वाढवला आहे. त्यामुळे कोरोनाची परिस्थिती आटोक्यात आणण्यासाठी लसीकरणावर भर दिला जात आहे. संभाव्य तिसऱ्या लाटेचा धोका लक्षात घेता लवकरात लवकर लसीकरण करण्यावर भर दिला जात आहे. अशातच आता लसींचा तुटवडा पडल्यानं आज मुंबईतील लसीकरण बंद राहणार आहे.

मुंबईत लसीकरण केलेल्या नागरिकांना लोकल ट्रेनमधून प्रवास करण्यास परवानगी देण्यात आली आहे. त्यामुळे लसीकरण करण्यासाठी सध्या झुंबड उडालेली पाहायला मिळत आहे. मात्र एकीकडे लसीकरणासाठी लाईन लागली असताना दुसरीकडे लसीचा तुटवडा भासत आहे. त्यामुळे आज मुंबईतील लसीकरण बंद राहणार आहे.

मुंबई महापालिका प्रशासनाने याबाबत माहिती देत सांगितलं की, लसीच्या अपुऱ्या साठ्यामुळे मुंबईतील सरकारी तसंच महानगरपालिका केंद्रांवर लसीकरण बंद राहणार आहे. लस साठा उपलब्ध झाल्यानंतर लसीकरण पुन्हा सुरु करण्यात येईल. मुंबईकर नागरिकांनी मुंबई महानगरपालिका प्रशासनाला सहकार्य करावं, असं आवाहनही मुंबईकरांना करण्यात आलं आहे.

दरम्यान, कोरोनाची संभाव्य तिसरी लाट येण्याची शक्यता तज्ज्ञांकडून वर्तवली जात आहे. ही तिसरी लाट लहान मुलांसाठी घातक असल्याचं म्हटलं जात आहे. सर्व नागरिकांनी कोरोना नियमांचं पालन करत सतर्कता बाळगण्याची गरज आहे. तेव्हाच आपण हा लढा लढू शकतो.