जय जवान, जय किसान; वाढदिवसाच्यानिमित्त युवराज सिंगचं चाहत्यांना ‘खास’ आवाहन

By Thodkyaat Last updated December 12, 2020 11:24 am

नवी दिल्ली | टीम इंडियाचा फायटर किंग युवराज सिंगचा आज वाढदिवस आहे. दरम्यान या वाढदिवसाच्या निमित्ताने युवराजने त्याच्या चाहत्यांना आवाहन केलंय.

सध्या देशात कोरोनाचं संकट आहे. त्यातच शेतकऱ्यांच्या आंदोलनाचा मुद्दा बराच गाजतोय. याच पार्श्वभूमीवर युवराज सिंगने आपला वाढदिवस साजरा करणार नसल्याचं सांगितलंय. यासंदर्भात त्याने चाहत्यांसाठी एक पत्रही लिहिलंय.

pic.twitter.com/MOUj65QtDs
— Yuvraj Singh (@YUVSTRONG12) December 11, 2020

युवराज पत्रात लिहीतो, “या वर्षी माझा वाढदिवस साजरा करण्याऐवजी लवकरात लवकर शेतकरी आणि सरकारमध्ये सुरु असलेल्या मुद्द्यावर समाधान निघावं यासाठी मी प्रार्थना करतो. देशातील शेतकरी समाजाची जीवनधारा आहेत. जगात अशी कुठलीच समस्या नाही, ज्यास शांतीपूर्ण चर्चेतून मार्ग काढला जाऊ शकत नाही, असं मला वाटतं.”

पत्रात तो पुढे म्हणतो, “देशातील कोविड 19 चं संकट अजून टळलेलं नाही. त्यामुळे नागरिकांनी खबरदारी घ्यावी. कोरोनाला हरवण्यासाठी आपल्याला संपूर्ण ताकदीने लढा द्यायचाय.”