“माझी आई माझ्या घरी राहते, मी कॅमेरावाल्यांना घेऊन आईला भेटत नाही”

By Bhagyashri Konarde On March 12, 2022 1:26 pm

मुंबई | पंतप्रधान नरेंद्र मोदी (PM Narendra Modi) यांच्या नेतृत्वाखाली भाजपला पाच राज्यांच्या विधानसभा निवडणुकीत (Assembly Election 2022) घवघवीत यश मिळालं. पाच पैकी चार राज्यात भाजपने जोरदार मुसंडी मारली. चार राज्यातील विजयानंतर पंतप्रधान मोदींनी शुक्रवारी गुजरातमध्ये भव्य रोड शो काढला.

सर्व राजकीय कार्यक्रम आटोपल्यानंतर पंतप्रधान मोदी त्यांच्या आईच्या भेटीला गेले. तब्बल दोन वर्षांनी पंतप्रधान मोदी व त्यांची आई हिराबेन यांची भेट झाली. या भेटीचे फोटो सोशल मीडियावर चांगलेच व्हायरल झाले. या फोटोवरून काँग्रेस नेते सचिन सावंत (Sachin Sawant) यांनी पंतप्रधान मोदींवर जोरदार टीका केली आहे.

माझी आई माझ्यासाठी विश्व आहे. माझी आई माझ्या घरी राहते. म्हणून माझ्या आईला मी दररोज भेटतो. मी माझ्या आईला भेटल्याशिवाय आणि आईला माझ्याशी भेटल्याशिवाय चैन पडत नाही. मी कॅमेरावाल्यांना घेऊन आईला भेटत नाही, असं ट्विट करत सचिन सावंतांनी पंतप्रधान मोदींवर निशाणा साधला आहे.

दरम्यान, पंतप्रधान मोदी व त्यांच्या आईच्या भेटीचे फोटो सोशल मीडियावर चांगलेच व्हायरल झाले. एका फोटोत मोदी त्यांच्या आईचा आशिर्वाद घेताना दिसत आहेत. तर दुसऱ्या फोटोत मोदी त्यांच्या आईसोबत बसून जेवण करत आहे. ऑक्टोबर 2019 नंतर मोदींनी पहिल्यांदाच त्यांच्या आईची भेट घेतली.

माझी आई माझ्यासाठी विश्व आहे. माझी आई माझ्या घरी राहते. म्हणून माझ्या आईला मी दररोज भेटतो. मी माझ्या आईला भेटल्याशिवाय आणि आईला माझ्याशी भेटल्याशिवाय चैन पडत नाही. मी कॅमेरा वाल्यांना घेऊन आईला भेटत नाही. https://t.co/OQ7iMakswz

— Sachin Sawant सचिन सावंत (@sachin_inc) March 12, 2022