पुण्यात आजही नव्या कोरोनाबाधितांमध्ये मोठी वाढ, दुसरीकडे डिस्चार्जची संख्याही मोठी

By Thodkyaat On June 29, 2020 9:47 pm

पुणे | पुण्यात गेल्या आठ दहा दिवसांपासून कोरोनाच्या नव्या रूग्णांमध्ये मोठी वाढ होत आहे. गेल्या आठवड्यापासून कोरोनाबाधितांमध्ये चांगलीच वाढ झाल्याचं चित्र आहे. आज सलग सातव्या दिवशी पाचशेहून अधिक रूग्णांची नोंद झाली आहे.

पुण्यात आज दिवसभरात 617 रूग्णांची नव्याने नोंद झाली आहे. त्यापैकी ससून 18, नायडू 365, खाजगी 234 रूग्ण उपचार घेत आहे. त्यामुळे आता पुण्याची एकूण रूग्णसंख्या 16 हजार 742 वर पोहचली आहे.

पुण्यात आता अ‌ॅक्टीव्ह रूग्णसंख्या 6195 एवढी आहे. शहरातील 482 कोरोनाबाधितांना आज डिस्चार्ज देण्यात आला असून यात नायडू-पुणे महापालिका 326, खासगी रुग्णालय 132 आणि ससूनमधील 24 रुग्णांचा समावेश आहे.

दरम्यान, पुण्यात 333 क्रिटिकल रुग्णांवर उपचार सुरू आहेत. त्यात 61 रुग्ण व्हेंटिलेटरवर उपचार घेत आहेत, अशी माहिती महापौर मुरलीधर मोहोळ यांनी दिली आहे.

दरम्यान, गेल्या अनेक दिवसांपासून पुण्यात कोरोना संसर्गाचा प्रसार मोठ्या झपाट्याने होत आहे. नव्याने नोंद होणाऱ्या कोरोनाग्रस्तांचं प्रमाण देखील मोठं आहे. राज्य शासनाच्या मदतीने महानगरपालिका प्रशासनाला कोरोना रूग्णसंख्या घटवण्यात कधी यश येत आहे तर कधी रूग्णसंख्या वाढते आहे हे गेल्या आठवडाभरापासून पाहायला मिळत आहे.

ट्रेंडिंग बातम्या-